tschagrun.ch

Cumpariu en las PUNTS 185 – puntissimo “Apocalipsa” – schaner 2010

Schurmegiar il clima? Suandar al meini da massa massa votantas e votants? Tedlar sin ils problems dallas tiaras dil tierz mund? Prender las hottas enta maun e midar zatgei sil mund? Ils politichers han puspei inagada mussau tgei ch’ei san il meglier: tschintschar, palavrar, far canera e dar mauns. 13 gis a Kopenhagen ein stai ina tribuna per mintga tschagrun che trai mintgaton bugen en in manti verd. Gronda reclama per che presidentas e presidents, ministers e ministras arrivan – persuenter han els survegniu ina presenza mediala garantida. X banchets ed  x plaids, x sesidas ed x gruppas da lavur. Ina “conferenza historica” cun in fazit historic: Il mund ei buca habels.

Buca habels da collavurar. Buca pronts da schurmegiar il clima. Buc aviarts per mesiras concretas cun sancziuns rigidas. Las tiaras industrialas teman per lur economia, per lur plazzas da lavur e per lur luxus da viver. Persuenter fan ei quei ch’ellas han gia fatg dapi tschiens onns: las tiaras industrialas vivan in imperialissem egoistic, las tiaras dil tierz mund ein la finala quellas che ston pitir sut la dominanza economica. Sche las Maledivas sfundran, sch’il Sudan ha negin’aua pli per stizzar la seit dils affons e sche l’Indonesia a gleiti mintg’onn in tsunami ei quei tuttina a memia biars. La conferenza a Flopenhagen vegn ad esser ina tolca en ils cudischs d’historia. Ella demuossa che la prontatad d’agir a favur da nossa mumma tiara ei buca presenta. Ei exista negina solidaritad internaziunala, negin giavisch da reducir ils effects negativs dalla midada dil clima provocada dallas tiaras industrialas cun lur veta en surabundonza. Sco politolog gi quei a mi ch’ils politichers e las politicras alla testa dallas tiaras han memia gronda tema da buca vegnir reelegids sch’ei ageschan claramein a favur dil clima, e speran pli bugen da puder salvar lur uffecis politics cun buca agir. Sco socialdemocrat gi quei a mi ch’il neoliberalissem fa puspei gegnas ed ei loschs da sesez e la nova perversiun ch’el ha creau – nus essan sclavs dall’economia e grazia al patertgar a cuorta vesta destruin nus cun plascher nossa mumma tiara. Sco carstgaun gi quei a mi che nus havein il 2009 per finiziun aunc astgau veser ina apocalipsa politica, ina tragedia en plirs acts cun differents acturs senza curascha ed interess singulars. E sco giuven gi quella conferenza a mi: “Nus essan vegls, nus vivin mo aunc 20 onns. Tgei ch’ei suenter stueis vus sez vegnir a frida. Nus lein ussa viver first class!” Jeu sun pli che trumpaus da quella “conferenza historica” e da quels politichers e quellas politicras.

Interessant tgei per fazits ch’ils politichers svizzers fan. Ils ins vulan sbassar las emissiuns da CO2 per 40 pertschien, ils auters figessan il pli bugen vinavon sco dacheu envi. Toni B. manegia ch’ei seigi buca bien d’agir persuls, sche las autras tiaras han buca mesiras semegliontas. Nossa economia fussi lu memia cara cumparegliada cun las autras tiaras. Mo – fussi forsa buca tuttina meglier da desister mintgaton d’empau luxus da viver che nus havein oz en surabundonza en Svizra? La finala han ils indians dall’America dil nord gia avon onns saviu: “Nossa tiara artein nus buca da noss tats e nossas tattas – nus emprestein ella da noss affons!” U che nus agin leusuenter ed acceptein las consequenzas per reducir ils effects negativs dalla midada climatica, ni che nus surprendin la responsabladad internaziunala che nus havein per nies planet e che las tiaras industrialas han enviers las tiaras paupras. Jeu sun per varianta dus, era sche quella ei buca schi emperneivla e pretenda sacrifezis.

Dieser Eintrag wurde am Dienstag, den 2. Februar 2010 um 23:33 Uhr erstellt und ist in der Kategorie Artikel, PUNTS, Politik, Rumantsch zu finden. Du kannst die Kommentare zu diesen Eintrag durch den RSS 2.0 Feed verfolgen. Du kannst zum Ende springen und ein Kommentar hinterlassen. Pingen ist im Augenblick nicht erlaubt.